top of page
LogoHeader 02.png
drapeau Timor Leste.png

INFORMASAUN

APRENDIZAJEN KONA BA DEFISIÉNSIA MATAN NO INSTRUMENTU BRAILLE
AHDMTL

APRENDIZAJEN KONA BA DEFISIÉNSIA MATAN NO INSTRUMENTU BRAILLE
AHDMTL

7 March 2023

AHDMTL nu’udar asosiasaun ida ne’ebé harí husi ema ho defisiénsia rasik. Nia harí hodi akomula ema ho defisiénsia matan no atu asegura direitu ba ema ho defisiénsia matan. Sira servisu halo advokasia ba governu, instituisaun no komunidade relasiona ema ho defisiénsia, espesialmente ba defisiénsia matan.

ICFP mós fo biban ba sira liu husi unidade Ensinu Estudante ho Nesessidade Espesiál (EDTS 200), atu bele halo advokasi no fahe esperiensia hanorin ne’ebé bele fasilita futuru manorin molok sira hola parte iha eskola no klase inkluzivu iha futuru.
Atividade ne’ebé sira realiza mak:
1. Aprezenta informasaun relasiona ho konseitu defisiénsia jeralmente no espesifikamente defisiénsia matan
2. Diálogu ho estudante kona ba asuntu refere
3. Aprezentasaun ba instrumentu braille no ninia funsaun
4. Simulasaun hanorin uza instrumentu braille hodi aprende literasia no númerasia
5. Estudante halo aprezentasaun uza instrumentu braille produs letra
Manorin ida presiza hatene informasaun kona ba tipu defisiénsia espesífiku defisiénsia matan, sira nia limitasaun, obstaklu no sira ninia diretu nune’e bele koñese sira diak no hola parte iha sira nia mundu. Manorin bele utiliza termu linguajen ne’ebé dignu ba ema ho defisiénsia atu labele tan hamosu estigmasaun negativu ba ema defisiénsia no defisiénsia matan iha eskola no sosiedade. Allende ne’e, bele proteje diretu ema ho defisiénsia iha sosiedade nia leet. Manorin mós presiza hatene nesessidade labarik ho portador defisiénsia atu lahalo deskriminasaun iha klase inkluzaun ba futuru.
Iha Timor-Leste, defisiénsia ninia persentajen aumenta liu-liu ba defisiénsia matan mós. Sira balun seidauk asesu ba edukasaun tanba ho sira nia limitasaun no oportunidade. Maibé balun hetan ona oportunidade iha area edukasaun. De facto, defisiénsia mós ema produtivu no kreativu tan ne’e, presiza biban atu sira bele dezenvolve-an no hatudu sira nia produtividade.
Material Braille nu’udar instrumentu importante atu fasilita ema ho defisiénsia matan aprende literasia no numerasia nune’e manorin sira presiza koñese no hatene nia funsaun molok utiliza.
Tan ne’e, iha atividade prátika uza instrumentu braille bele tulun ona estudante nu’udar kandidatu manorin hodi esperiensia no bele implementa iha klase inkluzaun iha futuru.

bottom of page