INFORDEPE no ICFP Baucau realiza avaliasaun ba formasaun preparatoria ba manorin bolsa kandiatura.
Iha Dili, 04 fevereiru 2025, Instituto Nacional de Formaçao de docentes et profissionais da Educaçao (INFORDEPE) no Instituto Catolico para formaçao de Professores (ICFP) Baucau realiza avaliasaun ba formasaun preparatoria ba manorin bolsa kandiatura ne’ebe mak realiza iha Rairobo, iha loron 9-21 fulan dezembru tinan 2024. Avalisaun ne’e husi presidente INFORDEPE, Mestre Domingos Martins, iha salaun INFORDEPE Balide Dili.
Husi avaliasaun aprezenta katak formasaun preparatoria la’o di’ak tebes tanba bele responde ba nesesidade manorin bolsa kandidatura sira, maski iha parte ki’ik balun ne’ebé mak presija halo di’ak liutan.
Nune’e Mestra Juvinália Ribeiro, reprezenta diretór ICFP, Ir. Paulo Gilchrist, fms, agradese tebes ba konfiansa ne’ebé mak fó husi Ministeiru Edukasaun liu husi INFORDEPE hodi realiza formasaun ne’e.
Basa okaziaun ne’e nu’udar privilejiu ida ba ICFP rasik nu’udar Instituisaun Ensinu Superior akreditadu hodi haluan ninia kooperasaun serbisu no bele fahe matenek no esperensia sira hodi kontribui ba edukasaun iha Timor-Leste liu husi formasaun ba manorin sira.
Iha sorin seluk mestre Domingos Martins, nu’udar president INFORDEPE agradese ba kooperasaun serbisu ne’ebé realiza entre ICFP no INFORDEPE, nia salienta liutan katak maski negosisaun ba kooperasaun serbisu ne’e lori deit tempu badak maibé ninia rezultadu di’ak tebes.